مظفرگڑھ، راجن پور او رڈی جی خان میں سیلاب سے جاں بحق افراد کے لواحقین کو مالی امداد دے دی گئی ، صوبائی وزیر منصور احمد خان

مظفرگڑھ (مظفرگڑھ ڈاٹ سٹی۔ 18 اگست2022ء) صوبائی وزیر ریو نیو نوابزادہ منصور احمد خان نے کہا ہے کہ جنوبی پنجاب کے سیلاب متاثرہ علاقوں راجن پور او رڈی جی خان میں سیلاب اوربارشوں جاں بحق ہونے والے افراد کے لواحقین میں 8،8لاکھ روپے کی مالی امداد دے دی گئی ہے۔و زیراعلیٰ پنجاب چودھری پرویز الہٰی نے سیلاب سے متاثرہ تمام علاقوں کو آفت زدہ قرار دیے دیا ہے- اس سلسلہ میں حکومت نے مختص 20 ارب روپے سے متاثرہ علاقوں میں فوری کام شروع کرنے کا حکم دیاہے۔متعلقہ حکام سیلاب متاثرین کی ہرممکن مددکر رہے ہیں ۔ انہوں نے کہا کہ وزیراعلیٰ چودھری پرویز الہٰی نے رود کوہیوں کے راستوں کو چینلائزڈ کرنے کا اعلان بھی کیا۔ پنجاب حکومت سیلاب سے متاثرہ افراد کے ساتھ کھڑی ہے۔

سیلاب متاثرہ افراد کی جلد بحالی حکومت کی پہلی ترجیحات میں شامل ہے۔انہوں نے کہاکہ مصیبت کی اس گھڑی میں اپنے سیلاب متاثرہ بہن بھائیوں کو تنہا نہیں چھوڑیں گے۔

حکومت نے سیلاب متاثرہ تمام علاقوں میں میڈیکل کیمپس بھی قائم کئے ہوئے ہیں جہاں سیلاب متاثرین کو وبائی امراض سے بچاؤ کی ویکسین لگائی جارہی ہے۔ انہوں نے کہا کہ کسی بھی سیلاب زدہ کی حق تلفی نہیں ہونے دی جائے گی۔ فصلوں اور گھروں کے نقصانات کا جلد ازالہ کے لئے سروے کیا جائے گا۔ انہوں نے کہاکہ حکومت کی ہدایت پر شارٹ ٹرم اور لانگ ٹرم کی منصوبہ بندی کیلئے پی ڈی ایم اے اور دیگر متعلقہ محکمے فوری کام شروع کریں گے، متاثرہ علاقوں میں ریلیف کیمپس قائم کردئیے گئے ہیں جہاں پر متاثرین کو باقاعدگی سے کھانا فراہم کیاجارہاہے، جبکہ میڈیکل کیمپس میں متاثرہ افراد کو وبائی امراض سے بچاؤ کی ویکسین بھی دی جا رہی ہے۔