مظفرگڑھ، دائرہ دین پناہ میں قتل کی لرزہ خیز واردات، دیرینہ دشمنی کی وجہ سے فائرنگ کے نتیجے میں ایک شخص قتل، دوشدید زخمی

مظفرگڑھ (مظفرگڑھ ڈاٹ سٹی۔ 25 جون2020ء) مظفرگڑھ کی تحصیل کوٹ ادو کے علاقہ دائرہ دین پناہ میں قتل کی لرزہ خیز واردات، دیرینہ دشمنی کی وجہ سے فائرنگ کے نتیجے میں ایک شخص قتل، دو افراد شدید زخمی۔ تفصیل کے مطابق شادا بھرانی گینگ اور طارق بلوچ کے درمیان کافی عرصہ سے دشمنی چلی آ رھی ھے۔ گزشتہ شب ساتھیوں سمیت گھر جاتے ھوئے طارق بلوچ پر گھات لگائے ھوئے شادا بھرانی نے فائرنگ کر دی۔طارق بلوچ کی جوابی فائرنگ سے گینگ کا سرغنہ شادا بھرانی جس کے خلاف 10 مقدمات پہلے سے درج ھیں موقع پر جاں بحق ھوگیا اور اس کے 2 ساتھی شدید زخمی ھو گئے جن میں سے ایک کو تشویشناک حالت کے پیش نظر نشتر ھسپتال ملتان منتقل کر دیا گیا ھے۔ شادا بھرانی کے ورثاء نے نور شاہ روڈ بند کرکے احتجاج کیا۔واقعے کی اطلاع ملتے ھی دائرہ دین پناہ پولیس کی بھاری نفری موقع واردات پر پہنچ گئی۔

پولیس طارق بلوچ کے نہ ملنے پر گھر میں گھس کر اس کی خواتین کو تھانے لے گئی جس پر بلوچ برادری اور اہل علاقہ نے شدید احتجاج کرتے ھوئے وزیر اعلی پنجاب، آی جی پنجاب، آر پی او ڈیرہ غازی خان اور ڈی پی او مظفرگڑھ سے اپیل کی ھے کہ چادر اور چاردیواری کے تقدس کو پامال کرکے بے قصور خواتین کو گرفتار کرنا بہت بڑی زیادتی اور خلاف قانون ھے۔ خواتین کو رھا کیا جائے اور ملزمان کے خلاف قانونی کارروائی کی جائے۔