News

مظفرگڑھ، حکومت کی ہدایات کی مطابق اشیاء خوردونوش کی قیمتوں میں خود ساختہ اضافہ ہر گز برداشت نہیں کیا جائے گا،ڈپٹی کمشنر

مظفرگڑھ (مظفرگڑھ ڈاٹ سٹی۔ 10 مئی2022ء) ڈپٹی کمشنر سید موسیٰ رضا نے کہا ہے کہ حکومت کی ہدایات کی مطابق اشیاء خوردونوش کی قیمتوں میں خود ساختہ اضافہ ہر گز برداشت نہیں کیا جائے گا۔ تمام دوکاندار حکومت کی طرف سے مقرر کردہ نرخوں کے مطابق اشیاء خوردونوش کی فروخت کو یقینی بنائیں ،خلاف ورزی کرنے والوں کے خلاف سخت کاروائی عمل میں لائی جائے گی۔

یہ بات انہوں نے انجمن تاجران اور کریانہ ایسوسی ایشن کے عہدیداروں کے ساتھ ایک اجلاس کی صدارت کرتے ہوئے کہی۔ اجلاس میں ایڈیشنل ڈپٹی کمشنر جنرل احسان الحق، ڈی او انڈسٹری رانا گلفام اور مارکیٹ کمیٹی سے ڈپٹی ڈائریکٹر نجیب فیض سمیت متعلقہ محکموں کے افسران نے شرکت کی۔ ڈپٹی کمشنر نے تمام پرائس کنٹرول افسران کو ہدایت کی کہ وہ روزانہ کی بنیاد پر بازاروں کا دورہ کریں اور گرانفروشوں،ناجائز منافع خوروں اور ذخیرہ اندوزوں کے خلاف کارروائی عمل میں لائیں، ان کو نہ صرف بھاری جرمانے کریں بلکہ ان کے خلاف ایف آئی آر درج کریں۔

ڈپٹی کمشنر نے مزید کہا کہ اشیاء خوردونوش سمیت کھاد ودیگر اجناس کی بھی سرکاری نرخوں پر دستیابی کو یقینی بنایاجائے۔ انہوں نے کہا کہ شادی بیاہ کی تقریبات میں ون ڈش کوبھی یقینی بنایاجائے اور وقت کی پابندی کی جائے،رات 10بجے کے بعد کوئی تقریب منعقد نہ کی جائے۔ انہوں نے اسسٹنٹ کمشنران کوہدایت کی کہ وہ مختلف اوقات میں مختلف بازاروں کا دورہ کریں اور خود ساختہ مہنگائی پر قابو پانے کے لئے عملی اقدامات کریں۔

انہوں نے کہا کہ وہ خود بھی مختلف اوقات میں ضلع بھر کے کسی بھی بازار کا دورہ کیا کریں گے۔ انہوں نے دوکانداروں سے اپیل کی کہ وہ اس خود ساختہ مہنگائی کے خاتمے کیلئے حکومت کا ساتھ دیں اور عوام کو ریلیف فراہم کریں۔ اجلاس میں صدر انجمن تاجران سید امیر حسن، کریانہ ایسوسی ایشن کے عہدیدار، مختلف بازاروں کے عہدیدار اور تنظیموں کے عہدیداروں نے شرکت کی اور یقین دلایا کہ وہ اس خودساختہ مہنگائی کے خاتمے کیلئے ضلعی انتظامیہ کے ساتھ ہرممکن تعاون کریں گے۔\378