مظفرگڑھ،علی پور میں بااثر افراد نے گھر میں گھس کر اسلحہ کے زور پر غریب محنت کش کی بیوی کو زیادتی کا نشانہ بنا ڈالا

مظفرگڑھ (مظفرگڑھ ڈاٹ سٹی ۔ 30 جولائی2019ء) مظفرگڑھ کی تحصیل علی پور میں بااثر افراد نے گھر میں گھس کر اسلحہ کے زور پر غریب محنت کش کی بیوی کو زیادتی کا نشانہ بنا ڈالا، پولیس بااثر افراد کے خلاف کارروائی کرنے سے گریزاں رہی، عدالتی حکم پر مقدمہ درج کر لیا گیا، ملزمان تاحال گرفتار نا کیئے جا سکے۔
تفصیل کے مطابق مظفرگڑھ کی تحصیل علی پور کے علاقے سیت پور میں بااثر افراد نے لاہور میں محنت مزدوری کی غرض سے گئے، غریب محنت کش سلیم عباس کی بیوی کو رات کی تاریکی کا سہارا لیتے ہوئے گھر میں گھس کر اسلحہ کے زور پر زیادتی کا نشانہ بنا ڈالا،متاثرہ خاندان اور علاقہ مکینوں نے بااثر ملزمان کی عدم گرفتاری پر احتجاج کیا۔

اس موقع پر میڈیا سے بات کرتے ہوئے، زیادتی کا شکار بننے والی خاتون کے شوہر اور علاقہ مکینوں نے بتایا کہ ہم غریب لوگ ہیں محنت مزدوری کرنے کے لئے باہر جاتے ہیں تو علاقے کے اوباش بااثر جرائم پیشہ افراد، بابر، صادق اور ان کے ساتھی گھروں میں گھس کر اسلحہ کے زور پر ہماری عزتوں کو تار تار کرتے ہیں، اس ظلم کے خلاف اگر ہم آواز اٹھاتے ہیں تو یہ لوگ ہمیں قتل کی دھمکیاں دیتے ہیں۔