News

مظفرگڑھ،ای روزگار پروگرام سے ہزاروں نوجوان مستفید ہو چکے ہیں،ملک تبریز

مظفرگڑھ (مظفرگڑھ ڈاٹ سٹی۔ 22 فروری2023ء) انچارج سنٹر ای روزگارپروگرام ملک تبریز نے کہا ہے کہ حکومت پنجاب کی جانب سے شروع کردہ ای روز گار پروگرام سے ہزاروں نوجوان مستفید ہوچکے ہیں جو نہ صرف خود ایک باعزت روزگار سے اپنی اور اپنے گھروالوں کی کفالت کررہے ہیں بلکہ زرمبادلہ کما کر ملکی معیشت میں بھی نمایاں کردار ادا کررہے ہیں۔

انہوں نے مزید بتایا کہ گورنمنٹ ایسوسی ایٹ کالج آف کامرس مظفرگڑھ میں ای روزگار ٹریننگ پروگرام کے اگلے بیچ کے داخلے جاری ہیں۔ای روزگار ٹریننگ پروگرام یوتھ افیئرز اینڈ سپورٹس ڈیپارٹمنٹ اور پنجاب انفارمیشن ٹیکنالوجی بورڈ کا ایک فلیگ شپ پراجیکٹ ہے جو نوجوانوں کو ڈیجیٹل سکلز اور فری لانسنگ کی مفت تربیت فراہم کر رہا ہے تاکہ نوجوان اپنے گھر بیٹھے آن لائن اور باعزت طریقے سے پیسے کما سکیں۔

انہوں نے کہا کہ سولہ سالہ تعلیم یافتہ نوجوان ای روزگار ٹریننگ پروگرام کے ذریعے پیش کردہ سات مختلف کورسز میں سے کسی ایک میں شامل ہو سکتے ہیں۔ ہر کورس میں نوجوانوں کو فری لانسنگ کی تربیت بھی دی جائے گی تاکہ امیدوار سیکھے ہوئے ہنر کو استعمال کرکے آن لائن کما سکیں۔اب تک اڑتالیس ہزار سے زائد نوجوان اس پروگرام سے تربیت حاصل کر کے فری لانسنگ کے ذریعے ماہانہ اچھی رقم کما رہے ہیں۔دلچسپی رکھنے والے امیدوار داخلہ کے لیے اپنی آن لائن درخواست ویب سائٹ www.erozgaar.pitb.gov.pk پر جمع کر سکتے ہیں۔