مظفر گڑھ۔9 فروری(مظفر گڑھ ڈاٹ سٹی۔ 09 فروری2017ء) وفاقی محتسب کی طرف سے عوام کی مختلف وفاقی محکمہ جات کے خلاف شکایات کا فوری ازالے کیلئے عملی اقدامات کئے جارہے ہیں،وفاقی محکموں کے خلاف وصول ہونے والی درخواستوں کی مقامی سطح پر سنوائی کی جارہی ہے یہ بات کنسلٹنٹ وفاقی محتسب کرنل (ر) سید باقر احسن نے مظفرگڑھ تحصیل آفس میں واپڈا کے خلاف موصول ہونے والی درخواستوں کی سماعت کرتے ہوئے کہی، انہوں نے کہا کہ سائلین اپنی درخواستیں آن لائن یا بذریعہ ڈاک وفاقی محتسب سیکرٹریٹ ریجنل آفس ،شمس آباد کالونی ملتان پر ارسال کرسکتے ہیں، سید باقراحسن نے واپڈا کے خلاف وصول ہونے والی 3درخواستوں کی سماعت کی ایک سائل کی درخواست پر انہوں نے ایس ڈی او حنیف جاوید کو 6ہزار روپے کا ریلیف اور بقایا رقم کی ادائیگی پر بغیر کسی چارجز کے بجلی کا میٹر لگانے کے احکامات جاری کئے، ایک سائل کی درخواست پر میٹر ریڈنگ درست کرنے کے احکامات جاری کئے جبکہ سادات کالونی مظفرگڑھ کے سائل کی درخواست پر اس کے گھر کی چھت سے گزرنے والی ہائی پاور تاروں کو کم سے کم وقت میں درست کرنے کے احکامات جاری کئے ، اس موقع پر کنسلٹنٹ سید باقر احسن نے ٹرانسفارمر کے تنصیب کی درخواست بھی وصول کی ، انہوں نے مزید بتایا کہ وہ آئندہ سماعت 21فروری کو جلالپور پیر والہ میں کریں گے جہاں پہلے سے وصولی درخواستوں کی سماعت کے علاوہ نئی درخواستیں بھی وصول کریں گے۔