طیب اردوان ہسپتال میں کورونا کے مریضوں کے لئے 62بستر مختص کردیئے گئے ہیں، ڈپٹی کمشنرمظفرگڑھ

مظفرگڑھ ۔ (مظفر گڑھ ڈاٹ سٹی۔ 18 مارچ2020ء) ڈپٹی کمشنر انجینئر امجد شعیب خان ترین نے کہا ہے کہ حکومت کی ہدایت کی مطابق طیب اردوا ن ہسپتال میں کورونا کے مریضوں کے لئے 62بستر مختص کردئیے گئے ہیں، جن کو 250بستروں تک بڑھایا جا سکتا ہے۔انہوں نے کہا کہ کورونا کے مریضوں کیلئے این 95ماسک سمیت دیگر ضروری ادویات اور سامان آچکا ہے۔ڈپٹی کمشنر نے بتایا کہ طیب رجب اردوان ہسپتال میں کورونا کے 8مریضوں کو بھیجا گیا تھا جن میں سے 7مریضوں کے ٹیسٹ مثبت آئے ہیں جن کا علاج ہسپتال میں جاری ہے۔ ڈپٹی کمشنر امجد شعیب خان ترین نے کہا کہ موجودہ صورت حال میں اشیاء خوردو نوش اور ادویات کی ذخیرہ اندوزی کا خدشہ ہے جس کی روک تھام کیلئے عملی اقدمات کئے جارہے ہیں تاہم میڈیا بھی ایسی افراد کی نشاندہی کرے، عوام میں خوف و ہراس نہ پھیلایا جائے بلکہ ان کا آگہی فراہم کی جائے کہ کسی جگہ پر اکٹھے نہ ہوں، غیرضروری طور پر گھروں سے نہ نکلیں، صفائی کا خاص خیال رکھا جائے، ہاتھ دھونے کو معمول بنایا جائے اور دوسروں کو بھی اس کی ترغیب دی جائے۔