News

ضلع مظفر گڑھ میں عید میلادالبنی ؐ کی تقریبات شروع،عقید ت و احترام سے منایا جارہا ہے،ایڈیشنل ڈپٹی کمشنر ریونیو

مظفر گڑھ(مظفرگڑھ ڈاٹ سٹی۔ 30 ستمبر2022ء) ایڈیشنل ڈپٹی کمشنر ریونیو تنویر مرتضیٰ نے بین المذاہب ہم آہنگی کمیٹی کے اجلاس کی صدارت کرتے ہوئے انہوں نے کہا کہ ضلع میں مستقل قیام امن کیلئے تمام مکاتب فکر کے علماء کرام اور اقلیتوں کے درمیان ہم آہنگی ہے۔ شہر میں سیوریج او رصفائی کی صورتحال کو بہتر سے بہتر بنانے کیلئے عملی اقدامات کررہے ہیں، جلد ہی ان مسائل کو حل کرلیا جائے گا۔

انہوں نے ہدایت کی کی ضلعی انتظامیہ اور پولیس عید میلاد النبیؐ کے مرکزی جلوس کے روٹ کو وزٹ کریں اور راستے میں موجود تجاوزات اور صفائی کے صورتحال کو بہتر بنائیں۔ اجلاس میں اے سی ہیومن ریسورس تیمور عثمان، ٹرینی اسسٹنٹ کمشنر عبدالحنان، ڈی ایس پی صدر محمد رضوان، ڈی ایس پی جتوئی سرکل نصراللہ خان بابر، انسپکٹر ذکی ریحان، سب انسپکٹر وسیم گوپانگ سمیت متعلقہ محکموں کے افسران بھی موجود تھے۔

اجلاس میں مولانا عبدالمعبود آزاد نے کہا کہ کوئی مذہب بد امنی کی اجازت نہیں دیتا، تمام الہامی کتابیں امن، محبت، اخوت اور بھائی چارے کا درس دیتی ہیں۔ انہوں نے کہا کہ ضلع میں پائیدار قیام امن کیلئے ہم سب انتظامیہ اور پولیس کے شانہ بشانہ کھڑے ہیں۔ جنرل سیکرٹری چرچ آف پاکستان روحیل فاروق نے کہا کہ ہم عید میلاد النبی ؐ کے موقع پر مسلم برادری کے ساتھ ہیں اور امن کیلئے ہر ممکن تعاون کے لئے تیار ہیں۔

اجلاس میں صدر انجمن تاجران امیر حسن، ممبر امن کمیٹی اختر بخاری، پادری رانا عرفان نے کہا کہ ضلع کو پر امن بنانے کیلئے تمام مکاتب فکر کے علماء کرام اور اقلیتی برادری کو ساتھ لے کر چلیں گے۔ اجلاس میں عاصم رحمت، چنوں رام پریمی سمیت اقلیتی برادری کے نمائندگان نے شرکت کی۔