ضابطہ اخلاق کی خلاف ورزی،ہارون سلطان بخاری کی ویڈیو فرانزک لیبارٹری ارسال کرنے کے احکامات

مظفر گڑھ۔5 جولائی(مظفر گڑھ ڈاٹ سٹی۔ 05 جولائی2018ء) ڈسٹرکٹ مانیٹرنگ آفیسر الیکشن و ڈپٹی کمشنر مظفرگڑھ نے ضابطہ اخلاق کی خلاف ورزی پر امیدوار حلقہ 186ہارون سلطان بخاری کے بیان کی ویڈیو تجزیہ کیلئے فرانزک لیبارٹری ارسال کرنے کے احکامات جاری کردئیے ہیں، اور ہارون سلطان بخاری کو 12جولائی کو خود پیش ہونے کا پابند کیا ہے ، قبل ازیں ان کے وکیل خالد جاوید بخاری اپنے وکالت نامے کے ہمراہ ڈسٹرکٹ مانیٹرنگ آفیسر کے پاس پیش ہوئے اور ہارون سلطان بخاری کا بیان حلفی جمع کرایا ،جس میں ان کا کہنا تھا کہ میں شریعت محمد پر عمل پیرا ہوں اورپاکستان کے تمام مردو خواتین کی دل و جان سے عزت کرتا ہوں، بزرگوں کو احترام اور چھوٹوں کے ساتھ شفقت سے پیش آتا ہوں، سوشل میڈیا پر جاری ہونے والی ویڈیو میں ان کے بیان کو توڑ مروڑ کر پیش کیا ہے ، میرے مخالفین میرے بارے میں افواہیں پھیلارہے ہیں، میں نے ضابطہ اخلاق کی خلاف ورزی نہیں کی۔واضح رہے کہ گزشتہ دنوں ایک ویڈیو میں سید ہارون نے خواتین کو ووٹ دینا حرام قرار دیا تھا۔