شیخوپورہ اور مظفر گڑھ میں دو ٹریفک حادثات میں خاتون سمیت 6افراد جاں بحق ،27زخمی

شیخوپورہ/مظفر گڑھ (مظفر گڑھ ڈاٹ سٹی۔ 29 مارچ2019ء) شیخوپورہ اور مظفر گڑھ میں دو ٹریفک حادثات میں خاتون سمیت 6افراد جاں بحق جبکہ 27زخمی ہو گئے ۔ بتایا گیا ہے کہ موٹروے ایم IIشیخوپورہ انٹرچینج سے 13 کلومیٹر اسلام آباد کی طرف جاتے ہوئے تیز رفتاری کے باعث مزدا وین کی کیری ڈبہ سے ٹکر ہوگئی جس کے نتیجے میں 3 افراد جاں بحق اور 7 شدید زخمی ہو گئے زخمیوں کو فوری طبی امداد کے لئے قریبی ہسپتال منتقل کردیا گیا ہے جہاں 2 زخمیوں کی حالت تشویشناک بتائی جارہی ہے۔ریسکیو ذرائع کے مطابق جاں بحق ہونے والوں میں 62 سالہ افتخار، 13 سالہ شہزاد ،خاتون رفعت بی بی شامل ہیں۔ہسپتال ذرائع کا کہنا ہے کہ 7 زخمیوں میں سے 2 کی حالت تشویشناک ہے۔دوسری جانب مظفرگڑھ میں لنگر سرائے کے قریب ٹرک اور زائرین کی بس کے درمیان تصادم کے نتیجے میں 3 افراد جاں بحق اور20 افراد زخمی ہوگئے۔ زائرین سخی سرورسے زیارت کرکے فیصل آباد جا رہے تھے۔ زخمی ہونے والے مسافروں کو ابتدائی طبی امداد کے بعد ڈسٹرکٹ ہیڈ کوارٹر ہسپتال منتقل کردیا گیا ہے۔