رنگ پور میں بڑھتی ہوئی چوری کی وارداتوں کو کنٹرول کرنے کیلئے گشت کا سلسلہ بہتر کیا جائے،اہل علاقہ

مظفرگڑھ۔ (مظفر گڑھ ڈاٹ سٹی۔ 20 دسمبر2018ء) چوری کی وارداتوں کا سلسلہ نہ رک سکا، نامعلوم چور تالے توڑ کر سنیارے کی سیف الماری اٹھا کر لے گئے۔تفصیل کے مطابق رنگ پور چوک سرور شہید روڑ پر رات گئے نامعلوم چوروں نے فیاض سنیارے کی دوکان کے تالے توڑ کر سیف الماری اٹھا کر فرار ہوگئے اور جاتے ہوئے ٹوٹے ہوئے تالے اٹھا کر اپنے تالے لگا گئے، صبح جب فیاض سنارہ دوکان کھولنے آیا تو دوکان کے تالے تبدیل دیکھ کر پولیس کو اطلاع کی۔پولیس کے آنے پر دوکان کھولی تو سامان الٹ پلٹ ہوا پڑا تھا اور سیف الماری غائب تھی، روز بروز بڑھتی ہوئی وارداتوں کی وجہ سے پہلے ہی رنگ پور کے تاجر پریشان تھے ،تاجران کی کال پر شٹرڈاؤن ہڑتال کرکے رنگ پور چوک کو بلاک کر دیا گیا۔ بعداز ڈی ایس پی سٹی ملک بشیر احمد اعوان موقع پر پہنچ گئے جن کی جانب سے کارروائی کی یقین دہانی پر روڈ کو کھول دیا گیا ،رنگ پور کے شہریوں نے ڈی پی او مظفرگڑھ سے مطالبہ کیا ہے کہ رنگ پور میں بڑھتی ہوئی چوری کی وارداتوں کو کنٹرول کرنے کیلئے گشت کا سلسلہ مزید بہتر کیا جائے تاکہ تاجر مالی نقصان سے بچ سکیں۔