دریائے سندھ اور چناب میں پانی کی موجودہ صورتحال کے مطابق مظفرگڑھ کو سیلاب سے خطرہ نہیں، ڈپٹی کمشنر

مظفرگڑھ۔ یکم جون (مظفرگڑھ ڈاٹ سٹی 01 جون2020ء) ڈپٹی کمشنر انجینئر امجد شعیب خان ترین نے کہا ہے کہ دریائے سندھ اور دریائے چناب میں پانی کی موجودہ صورتحال کے مطابق ضلع مظفرگڑھ میں سیلاب سے کوئی خطرہ نہیں ہے تاہم کسی بھی ہنگامی صورتحال سے نمٹنے کیلئے ضلعی انتظامیہ کی طرف سے تمام تر انتظامات مکمل ہیں، ضلعی انتظامیہ اور تمام متعلقہ محکمے اپنی اپنی پیشہ وارانہ ذمہ داری نبھانے کیلئے تیار ہیں، یہ بات انہوں نے سیلاب کی صورتحال کا جائزہ لینے کے لئے دریائے سندھ پر قائم عباس والا بند سمیت دیگرحفاظتی بندوں کا معائنہ کرتے ہوئے کہی۔اس موقع پر ممبر صوبائی اسمبلی اشرف رند بھی ان کے ہمراہ تھے۔ ڈپٹی کمشنر نے متعلقہ محکموں کے سربراہان کو ہدایت کی کہ وہ موجودہ وسائل کو استعمال کرتے ہوئے اپنے اپنے اداروں کے سیلاب سے متعلقہ پلان کو حتمی شکل دیں تاکہ کسی بھی ہنگامی صورت میں مشکلات کا سامنا نہ کرنا پڑے۔انہوں نے محکمہ آبپاشی کے افسران کو ہدایت کی کہ دریا کے راستوں پر قائم تجاوزات کو ختم کیا جائے، کمزور فلڈ بندوں او رپشتوں کی تعمیرو مرمت کے کام کو جلد سے جلد مکمل کیا جائے۔

انہوں نے بتایا کہ امدادی کارروائی کیلئے 1122 کی ٹیمیں متعدد بار مشقیں کرچکی ہے۔ اس موقع پر ممبر صوبائی اسمبلی نے کہا کہ حساس مقامات کی نشاندہی کردی گئی ہے، فلڈ بندوں اور پشتوں کی تعمیرومرمت کا کام جاری ہے جس کو جلد سے جلد مکمل کرلیاجائے گا۔ انہوں نے کہا کہ سیلا ب سے بچاؤ کیلئے ضلعی انتظامیہ کی طرف سے کئے گئے انتظامات قابل تحسین ہیں۔