تھل جیپ ریلی سے ضلع کی ثقافت و علاقائی کھیلوں کوفروغ ملے گا، ڈپٹی کمشنر

مظفر گڑھ۔15 نومبر(مظفر گڑھ ڈاٹ سٹی۔ 15 نومبر2017ء)ڈپٹی کمشنر مظفرگڑھ محمد سیف انور نے کہا ہے کہ ضلع مظفرگڑھ میں دوسری بین الاقوامی معیار کی تھل جیپ ریلی ضلع کیلئے ایک اعزاز ہے، جس میں بین الاقوامی شہرت یافتہ ڈرائیورز شرکت کریں گے، اس میگا تقریب کے انعقاد سے جہاں عوام کو ایک صحت مند تفریح میسر آئے گی وہاں ضلع کی ثقافت اور علاقائی کھیلوں کو بھی فروغ ملے گااور مظفرگڑھ کے نام کو بین الاقوامی سطح جانا جائے گا۔یہ بات انہوں نے دوسری بین الاقوامی تھل جیپ ریلی کے سلسلے میں منعقدہ ایک اجلاس کی صدار ت کرتے ہوئے کہی۔ اے ڈی سی ریونیو عطاء الحق بھی ان کے ہمراہ تھے۔ ڈپٹی کمشنر نے بتایا کہ ریلی کیلئے تمام انتظامات کو حتمی شکل دیدی گئے ہے ، جس میں سکیورٹی کے فول پروف انتظامات کئے گئے ہیں، ٹریک ہیڈ محمد والا سے شروع ہو کر ضلع لیہ کی حدود سے ہوتا ہوا واپس ہیڈ محمد والا پر ختم ہوگا،ٹریک کے راستے میں بنائی گئی چیک پوسٹ پر پولیس اہلکاروں کے ساتھ ریسکیو 1122کا عملہ اور ایمبولینس موجود ہونگی،انہوں نے اے سی مظفرگڑھ سیف اللہ بھٹی اور اے سی کوٹ ادو کو ہدایت کی کہ وہ اپنی تحصیلوں کی حدود میں ریلی کے ٹریک کی مانیٹرنگ کو یقینی بنائیں،انہوں نے کہا کہ ریلی کو کامیاب بنانا ہم سب کی ذمہ داری ہے،اس سلسلے میں کوئی سستی یا کوتاہی برداشت نہیں کی جائے گی۔اس موقع پر اے ڈی سی ریونیو عطاء الحق نے بتایا کہ 3روزہ تقریبات میں 17نومبر کو ابتدائی مرحلے میں گاڑیوں کی پڑتال،نمبرز کی الاٹمنٹ اور ڈرائیورز کی نیویگیٹرکانفرنس ہوگی، 18نومبر کو کوالیفائیڈ رائونڈ ہوگا جبکہ 19نومبر کو صبح ساڑھی8بجے ریس کا آغاز ہوگا جو شام4بجے ختم ہوگا،جس کے بعد فیصل سٹیڈیم مظفرگڑھ میں انعامات کی تقسیم کی تقریب کا انعقاد ہوگا،انہوں نے مزید بتایا کہ شائقین کو صحت مند تفریح فراہم کرنے کیلئے بھی انتظامات کئے گئے ہیں۔