توسیعی پروگرام برائے حفاظتی ٹیکہ جات کی بہتری کیلئے تمام دستیاب وسائل بروئے کار لائے جائیں گے،ڈپٹی کمشنر

مظفرگڑھ۔3فروری(مظفرگڑھ ڈاٹ سٹی ۔ 03 فروری2021ء) ڈپٹی کمشنر انجینئر امجد شعیب خان ترین نے کہا ہے کہ توسیعی پروگرام برائے حفاظتی ٹیکہ جات کی بہتری کیلئے تمام دستیاب وسائل بروئے کار لائے جائیں گے،مطلوبہ مقاصد و اہداف کو حاصل کرنے کیلئے ویکسینیٹرز اپنے فرائض منصبی دیانتداری سے سرانجام دیں۔ یہ بات انہوں نے محکمہ صحت مظفرگڑھ میں حالیہ بھرتی ہونے والے ویکسینیٹرز کی دو روزہ تربیتی ورکشاپ سے خطاب کرتے ہوئے کہی۔
انہوں نے کہا کہ وہ خود فیلڈ میں جاکر ای پی آئی کام کا جائزہ لیں گے اس دوران خراب کارکردگی کا مظاہرہ کرنے والے افراد کے خلاف فوری کارروائی عمل میں لائی جائے گی جبکہ اچھی کارکردگی کا مظاہرہ کرنے والے اہلکاران کو تعریفی اسناد جاری کی جائیں گی انہوں نے گذشتہ کریش پروگرام میں بہتر کارکردگی والے اہلکاران کو تعریفی اسناد جاری کرنے کی تاکید کی انہوں نے کہا کہ نئے بھرتی ہونے والے ویکسینیٹرز کیلئے موٹر سائیکل اور پٹرول کی فراہمی کو یقینی بنایا جا ئے تاکہ وہ اپنے فرائض منصبی بہتر طور پر ادا کر سکیں۔
قبل ازیں ڈاکٹر امیر بخش اور ڈاکٹر کاظم خان ڈی ایچ او نے ضلع میں سی ای پی آئی اور ویکسینیٹرز کے پی او ایل کی صورتحال سے آگاہ کیا انہوں نے بتایا کہ ان ویکسینیٹرز کو ضلع میں ترجیح بنیاد وں پر تعینات کیا گیا ہے تاکہ حفاظتی ٹیکہ جات کے پروگرام میں بہتری لائی جاسکے ۔اس موقع پر شاہد ریاض ڈی ایس وی مبشر رضا عدنان لغاری میڈیا کوآرڈینیٹر اور اصغر چانڈیہ بھی موجود تھے۔