مظفر گڑھ۔31 اکتوبر(مظفر گڑھ ڈاٹ سٹی۔ 31 اکتوبر2017ء)چیف صوبائی ایڈوائزر برائے اطفال لاہور توصیف اشرف نے کہا ہے کہ بچے کسی بھی معاشرے کی بنیاداور مستقبل ہوتے ہیں، بچوں کے حقوق کا تحفظ ہم سب کی مشترکہ ذمہ داری ہے،یہ بات انہوںنے مظفرگڑھ میں ضلعی محکموں کے افسران اور غیر سرکاری تنظیموں کے نمائندگان کے ساتھ ایک اجلا س کی صدارت کرتے ہوئے کہی،انکا کہنا تھا کہ محتسب پنجاب کی ہدایت پر ضلعی سطح پر بچوں کے حقوق کے تحفظ کیلئے خصوصی سیل بنایاگیا ہے ، بچوں کے حقوق سے متعلقہ مسائل اور شکایات ضلعی دفتر پنجاب محتسب میں ضلعی ایڈوائزر کو جمع کرائی جاسکتی ہیں، اس کے علاوہ ای میل، فیس بک، ویب سائٹ اور 1050پر مفت ایس ایم ایس کے ذریعے بھی شکایات رجسٹر کرائی جاسکتی ہے، انہوں نے کہا کہ غیر سرکاری تنظیمیں اس سلسلے میں عوام بالخصوص بچوں میں آگاہی پیدا کریں تاکہ ان کے مسائل کو فوری طور پر حل کیا جائے اور ان کے مستقبل کو محفوظ بنایا جاسکے، انہوں نے کہا کہ خصوصی سیل کے قیام کو مقصد بچوں کے مسائل کو جڑسے ختم کرنا ہے ان کے فلاح و بہبود کیلئے مربوط حکمت عملی مرتب کرناہے، تاکہ چھوٹے چھوٹے مسائل بڑھ نہ سکیں،اس موقع پر ایڈوائزر محتسب پنجاب سمیع اللہ نے بتایا کہ بچوں کے حقوق کے سلسلے میں پہلے سے قوانین موجود ہیں، جن پر عمل درآد کو یقینی بنایا جائے،معاشرے کے ہر طبقہ بالخصوص سرکاری محکموں کے افسران اور غیر سرکاری تنظیموں کو اپنا فعال کردار ادا کرنا ہوگا، اجلاس میں ڈسٹرکٹ ایڈوائزر محتسب پنجاب حمید اللہ، محکمہ سوشل ویلفیئر کے آفیسر اظہر یوسف، پولیس انسپکٹر عاشق، ممبر سول سوسائٹی نیٹ ورک افضل چوہان،چیئر پرسن سائیکوپ ام کلثوم سیال، نوشین بخاری،ناظم بلوچ و دیگر تنظیموں کے نمائندگان نے شرکت کی۔