آم کے باغات میں ڈائی بیک کی بیماری کے تدارک کیلئے پودوں کی خشک شاخیں کاٹ دیں،ڈپٹی ڈائریکٹرزراعت

مظفر گڑھ۔ (مظفر گڑھ ڈاٹ سٹی۔ 11 جنوری2017ء) ڈپٹی ڈائریکٹرزراعت (توسیع ) مظفرگڑھ مہر عابد حسین نے کہا ہے کہ دسمبر ، جنوری اور فروری آم کے پودے کی خوابیدگی اور پھولوں کے نکلنے کے نازک مراحل ہیں، آم کے باغبان اس دوران زرعی سفارشات پر عمل کریں، انہوںنے کہا کہ آم کے باغبان آم کے باغات میں ڈائی بیک کی بیماری کے تدارک کیلئے پودوں کی خشک اور مری ہوئی شاخیں کاٹ دیں اور تنوں کو صاف کریں، کاپر آکسی کلورائیڈ 300گرام فی 100لیٹر پانی کے ساتھ سپرے کریں اور یہ عمل پھول آنے سے پہلے مکمل کرلیں۔انہوں نے کہا کہ باغبان آم کے پودوں پر ملی بگ کو ہرگز نہ چڑھنے دیں، تنوں پر لگے پھندوں پر جمع اور زمین نے نکلنے والی ملی بگ پر پروفینو فاس کا600ملی لیٹرفی 100لیٹر پانی کے ساتھ سپرے کریں، انہوں نے مزید کہا کہ محکمہ زراعت توسیع کے زرعی ماہرین فیلڈ میں آم کے باغبانوں کی رہنمائی کیلئے موجود ہیں کسی بھی مسئلہ کے حل کیلئے اس سے رابطہ کیا جاسکتا ہے۔