اسسٹنٹ کمشنرنے کاشتکاروں کی ادائیگی میں تاخیر پرشوگر مل سیل کر دی ۔ تین افراد گرفتار

مظفرگڑھ (مظفرگڑھ ڈاٹ سٹی۔ 23 فروری2023ء) ڈپٹی کمشنر آغا ظہیر عباس شیرازی کی ہدایت پر اسسٹنٹ کمشنر مظفرگڑ ھ ناصر ڈوگر نے گنے کے کاشتکاروں کی رقم کی ادائیگی میں تاخیر اور انتظامیہ سے تعاون نہ کرنے پر رحمان حاجرہ (تاندلیانوالہ) شوگر مل کے خلاف کاروائی کرتے ہوئے، مل انتطامیہ کے 3افراد کو گرفتار کرلیا اور مل کا کنڈا سیل کردیا گیا ہے۔

اسسٹنٹ کمشنر ناصر ڈوگر نے بتایا کہ مل کے خلاف کاشتکاروں کی متعدد شکایات موصول ہورہی تھیں جس پر ڈپٹی کمشنر نے نوٹس لیتے ہوئے مل کے خلاف کاروئی کے احکامات جاری کئے، مل انتظامیہ سے کاشتکاروں کی فہرست جن کی رقم واجب الادا ہے طلب کی گئی، سی پی آر طلب کی گئیں مل انتطامیہ نے کوئی تعاون نہ کیا جس پر یہ کارروائی عمل میں لائی گئی ہے۔ انہوں نے بتایا کہ مل کے ذمہ ایک ارب سے زائد کی رقم واجب الادا ہے جو گنے کے کاشتکاروں کو دینی ہے، انہوں نے بتایا کہ مل انتظامیہ کے نمائندگان سے مذاکرات کئے گئے ہیں اور ان کو کہا گیا ہے کہ تمام کاشتکاروں کی فہرست فراہم کی جائے جن کی رقم دینی ہے، سی پی آر فراہم کی جائے اور یہ بیان حلفی دیا جائے کہ 7سے 10دن میں تمام کاشتکاروں کی رقم اد کردی جائے گی۔